Na II Gala do Deporte do Concello de Gondomar, resultaron premiados dous deportistas do noso Club Xadrez Laroca. Esta vez foron Ana Fernández Carneiro en feminino, que repite por segundo ano, e Artai Bringas Gómez en masculino.
Artai Bringas Gomez, residente en Peitieiros, é un dos valores de futuro do noso club. Aos seus 14 anos xa dispón dun ELO de 1.778 e consegue poñerlle as cousas moi difíciles a mestres do xadrez con moita máis experiencia que él. Actualmente está a disputar a liga Galega de Xadrez no equipo do Laroca-C onde xogando sempre nos primeiros taboleiros segue invicto, con 5 vitorias e 1 táboas das cinco partidas que disputou en segunda división e unha en primeira co Laroca-A. Ademais participou neste ano no Campionato Provincial de Pontevedra sub-14, onde quedou segundo empatado a puntos co primeiro, e no Campionato Galego sub-14 conseguindo terminar no oitavo posto dun total de 43 participantes.
No noso club temos postas grandes esperanzas neste pequeno gran cerebro e cremos que pode facer grandes cousas neste deporte do xadrez, de feito xa as está a facer e a súa progresión é incrible.
Por todo isto e por moito máis foi premiado nesta II Gala do Deporte de Gondomar como mellor deportista na disciplina de xadrez deste Concello.
Na categoría feminina de Xadrez, un ano máis, recibiu o premio Ana Fernández Carneiro que tamén con 14 anos segue superándose a se mesma ano a ano. Neste 2017 participou no Campionato Provincial de Pontevedra sub-14, onde acadou o posto once da clasificación xeral e primeira feminina, e no Campionato Galego sub-14 terminando no posto dezaoito da clasificación xeral e logrando converterse na subcampioa feminina. É tamén unha habitual nos torneos do Circuíto Galego de promoción onde o ano 2015 logrou o título de campioa feminina na categoría sub-12.
Pero Ana non queda aquí, segue e segue e nestes días de Semana Santa vai probar nunha categoría superior, participando no Campionato Galego sub-16 que se celebra en Padrón. Pero como isto parécelle pouco, tamén se atreve a ir ao campionato de España que se celebrará en Salobreña nos meses de verán, o que seguro que para ela será unha experiencia inesquecible.
Os nosos parabéns a estes dous campións e, como non, aos seus orgullosos pais e nais que, como se pode ver na foto, non caben da dicha, a aposta dos seus fillos por este deporte e a felicidade que lles produce os enche de satisfacción.
Pero quero rematar cunha garimosa aperta persoal para eles dous. Para tí, Ana, a miña sobriña afillada-postiza da que me sinto moi orgulloso, e para tí Artai, o meu compañeiro no Laroca-C do que presumo e seguramente no futuro poderei presumir mais e cando sexa famoso direi aquelo de que "eu xoguei no memos equipo que él aló polo ano 2017"
No hay comentarios:
Publicar un comentario